03-21-2009, 09:03 PM | #11 |
[حـب ].. كل الحب
فارسة الخواطر ..}~ََ
|
بسم الله الرحمن الرحيم
بعد طول الانتظار..و بعد ما صارت بطونكم ناااااار من الجوع اجتكم رد روحي و معها اشهى اكلة اردنية معتبرة...اكيد عرفتوها ..ايون..طبعا...(( المنسف الاردني )) المنسف اكلة اردنية بمعنى الكلمة..يعني مش ممكن يتنفذ الا في الاردن..لان في شي في المقادير مش موجود الا في الاردن و هو (( الجميد )) ..الجميد عبارة عن لبن صلب بكون محفوظ بالملح .. ندخل عالمفيد.. المقادير المطلوبة لاحلى و افخم سدر منسف ..و هدا ممكن يكون ل 8 اشخاص.. 1_ 5 كيلو لحم هبر مقطعه قطع متوسطة الحجم. 2_ حبتين لبن جميد 3_ بصلة صغيرة 4_ ملعقة كبيرة سمن بلدي 5_ 2 كيلو ارز مصري اي نوع..انا بفضل ( تايجر ) 6_ كركم و هيل حب و ورق غار و فلفل اسود حب و مطحون و ملح و روزماري 7_ زيت ذرة او سمن نباتي . 8_ خبز شراك ..و هو خبز عربي رقيق كتير 9_ لوز و صنوبر و كاجو مقليين 10_ بقدونس مفروم ناعم. الطريقة بنظف قطع اللحم كويس بالماء ..و بنجيب طنجرة كبيرة ..بنفرم البصلة في الطنجرة لقطع صغيرة و بنحط السمن البلدي.. بنجيب حبات الجميد و بندقهم لحد ما يصيرو قطع صغير زي البودرة.بننقعهم في الماء الساخن في وعاء و بنتركهم ساعة تقريبا.. بنشغل النار تحت الطنجرة و بندبل البصلة شوي و بنحط اللحمة على البصلة و السمن..بنقلبها شوي و بنضيف كل البهارات اللي ذكرتها..الهيل حب و مطحون..و الفلفل الاسود حب و مطحون ..و ورق الغار ( ورقتين) و كم ورقة روزماري و شوية ملح..ما تكترو لان الجميد بكون مالح شوي.. بعد ما نقلب اللحمة مع البصل و السمن و الهارات بنضيف الماء المغلي لحد ما يغمر اللحم كويس.. و بنغطي الطنجرة و بنوطي النار تحتها و بنروح شوي عاللابتوب ..ههههههههه بس اوعو تنسو الطبخة عالنار لحد ما تتبخر المهم يا حلوين..هلأ بنجيب الجميد المنقوع و بنخلطه في الخلاط الكهربائي لحد ما يصير زي اللبن السائل..و بنصفيه بالمصفاة الناعمة و بنتركه.. بنشوف اللحمة استوت ولا لا..كل ما كانت مستوية اكتر كل ما كانت اطيب..لما تكون استوت اللحمة بنضيف اللبن الجميد السائل الى اللحمة و بنحرك في ملعقة كبيرة لحد ما يختلط اللبن بالماء و اللحم..بنتركه شوي يغلي على نار هادية و بنعمل الرز المفلفل.. بنجيب طنجرة تانية و بنحط فيها ملعقة زيت ذرة و ملعقة سمن نباتي او سمن بلدي..( حسب الرغبة ) بنكون طبعا ناقعين الرز لمدة نص ساعة و مصفينه و مجهزينه..بنضيفه للزيت في الطنجرة و بنحركه مع الزيت و بعدين بنحط ماء مغلي لحد ما يغمر الرز بشوي..و بنضيف ملح و كركم عشان يصير الرز لونه اصفر.. بس يغلي الرز بنوطي النار عالآخر و بنترك الرز ليستوي على مهله..بس يستوي بنطفي تحته..و بكون اللحم و اللبن كمان جاهزين.. هلأ بنجيب السدر اللي بدنا نقدم فيه.. بنفرد عليه خبز الشراك و بنجيب الرز و بنفرده بشكل مرتب.. بنجيب ملعقة مشبكة كبيرة.. بنطول قطع اللحم من الطنجرة و بنرتبها على السدر..و بنرش البقدونس المقطع و اللوز و الصنوبر و الكاجو المقليين.. بنصفي اللبن بالمصفاة في طنجرة تقديم ..و بتصيرو يا حلوين تديرو اللبن على الرز و توكلو...و طبعا المنسف اللي على اصوله بيتاكل بالايد . و الف صحة و هنا على قلوبكم يا حلوين.. مع خالص الود و التقدير لكم جميعا الشيف رد روحي |
التعديل الأخير تم بواسطة رد روحي ; 03-21-2009 الساعة 09:31 PM
سبب آخر: احلى منسف لعيونكم
|
مواقع النشر (المفضلة) |
الذين يشاهدون محتوى الموضوع الآن : 1 ( الأعضاء 0 والزوار 1) | |
|
|