ضحكة روميو وجولييت



عيونك دى ياحبيبتى وراها عيون

ومين يمشى ورا عيونك

أكيد مجنون





عيونك ديه غنيوة وحلم محال

عيونك هى الممكن

لكن من الصعب انه يكون



انا توهت فى شوارعها

مع انى بعيش فيها

سهرت الليل أناديلها

وأسال فين هلاقيها

يعدى الليل وانا بسأل

أنا أمتى هأكون ليها؟




عيونك ديه يا حبيبتى كتاب مفتوح

ومش مفتوح

بشم العطر فى حروفه

ولو أقرب

فى ثانية يروح

ده لو جارح

بكون مجروح





سفن راسية فى موانيها

وألف مدينة جنبيها

وطفل جميل يغنيلها

وقلب حزين يعزيها

وده رايح وده جاى

ولما تنام بترمى يسلام

على الدنيا يغطيها....



عيونك فيها العاشق يكون سلطان

يلاقى حبيبته جاياله

وشيلاله فى إيدها حنان
ولو حست بأوهامه

يلاقى الدمع قدامه

بيرقصله فى كل مكان




عيونك فيها اللذة وفيها الاه

وفيها كلام ماله معنى

وفيها كلام بيمنعنا

وفيها الرقص والمغنى

وحلم جميل بنستناه



فى عينيكى تاريخ الحب

وضحكة روميو لجولييت

وجارح أسى ماله قلب

وفاكر جرحه لىا بسيط



يا حبيبتى انا غلبان

وفهمى للحياه محدود

بخاف التهوهة فى عيونك

ومش شايف لقلبى حدود

نفسى فى كلمة اسمعها

(أنا عاشقة عنيك السود)

قوليها

ده انا علمى على قدى

وماعرفش فى هواك شروط