تكفون للفاضين والطفشانين المشغول يتوكل على الله

تكفون للفاضين والطفشانين المشغول يتوكل على الله


08-28-2003 12:47 AM



بسم الله الرحمن الرحيم

يوم الأربعاء الماضي وصلني أبناء عمومتي ووجهاء من أبناء حارتي وكان في مقدمتهم سعيدان الأهطل ولد صاحب بقالة حارتنا لكن رجال الأمن في المطار طردوه عشان ملامحه كانت إرهابية هذا عدا السعابيل إذا جاء يتكلم يعني خذ معك منديل إذا وده يسولف معك عشان تمسح وجهك
مالكم في الطويلة أخذت شنطتي إلي عليها عشرين استكر منها مكتوب قابل للكسر ومنها استكرات دعائية إلي دايما نحصلها في باب البيت مثل مؤسسة فلان لنقل العفش ومؤسسة زعطان لرش المبيدات الحشرية ومحاربة النمل الأبيض والأسمر
ودعت الحبايب وودعوني ودمعتي كانت يادوب بتنقط لولا إني شفت وحدة مزيونة ماشية قدامي وقتها نسيت أهل إلي جابوني وجمدت المودعين ورحت اركض وراها قلت عسى يجي مقعدها جنب مقعدي وارتز جنبها وبأسوي يعنني ولد شيوخ وخرجت ( تولة ) ورد كنت شاريها من الطائف أيام أزمة الخليج بمبلغ وقدرة ( 1800 ) ريال بعد ما ناحلت (ابو يمن ) ألين طفشتة وباعها لي وما اتدهن فيها الى في المناسبات الوطنية علشان ما تخلص خابرين مناسباتنا قليلة بالمقارنة مع مصر أم الدنيا ألا على فكرة إذا مصر أم الدنيا منهو أبوها 00 ما علينا
ركبت الطائرة أنا وشدوقي ( دلع خدودي ) وبالفعل جاء مقعد المزيونة جنب مقعدي وقعدت اغني بيني وبين نفسي ( أوقاتي بتحلو بتحلو معاك ) رحبوا فينا المضيفات والمضيفين وقامت الدلال ( القهوة ) تشم ريحتها من أخر المطار مزودين الهيل وجابولنا من التمر السكري الي قلبك يحبة ويوم ان المضيف يصب القهوة أول يأخذك عربة ( يبوسك ) وبعدين يصب القهوة والمضيفة واقفة خلفة بصحن وفي قول أخر ( تبسي ) التمر بعد ما قهوونا جاء صوت الكابتن ( ظافر ) يرحب فينا

الكابتن / يالله حيهم 00 حياكم الله يا الربع مرحباً ( 1000) على طيارتنا الجامبو وابشركم الجو ما احلى منة وتقدرون تفتحون قزاز الشباك إذا لقيتم عليكم حر بس لا ترمون قواطي ( علب ) الببسي من الشباك هذا أنا فداكم ممنوع لا انقز فوق بطونكم 00 وعلية الطلاق ان غداكم ذا النهار عندنا قولوا تم أنا فدا ذي الخشوم 00 ونعتذر كلنا بصوت واحد والله يابو الكباتن مانقدر عندنا شغل وهو يصيح بالمكرفون أقول يا الجن ( بقعاء تصوعكم ) طلقت ويش قومكم ما تفهمون انتم
قلنا امرنا لله غدوة تروح ولا حد يموت
وهو يعشق الطيارة في الأول ويعطيها بنزين ويوم قرب يقلع ربط فرملة بغت تتكسر روسنا ويش فيك يا ظافر الله يهديك 00 قال 00 سوري يعننة لبناني 00 قدامنا تفتيش كل واحد يربط الحزام لا تبلشونا مع المرور الله يعافيكم خلص المرور من التفتيش وأقلعنا وكل شوي وأنا اسرق النظر للمزيونة الي جنبي لا كنها ماهي راضية تنبت ببنت شفاة ( ينعل ابو اللغة يا عنتر) المهم يوم أخذنا ساعة وألا المضيفين يقلطونا على الغداء في الصالة الثانية حقت الأكل ونقوم وندخل وألا الكابتن واقف بنفسه يرحب فينا الحقيقة خجلنا ذابح لنا خمس طليان ( خرفان ) حتى أخر خروف بعد معلق في حمام الطيارة يا دوب يسلخونها الملاحين الجويين بمساعدة المضيفين 00اعتقد انة غداء الحريم 00 المهم مسوين لنا ذيك المفطحات وعليها شعار الخطوط السعودية شيء يشرح الخاطر والله 00 تغدينا وقمنا نغسل وحصلنا مساعد الكابتن ماسك المنشفة وقارورة عطر ( كلونيا ) مثل الي يشربونها عرابجة حارتنا ابو عشرة ريال علشان يعطر أيدينا تعرفون ريحه الزفر ونعود مقاعدنا وقلطوا الحريم بعدنا وافتح علبة الميرندا وأمزمزها وافتح شوية من الشباك ذاك الهواء الي يرد الروح
ويوم رجعت خويتي جنبي وهي تتخلل وكل شوي تخرج قطعة لحمة من بين سنونها اعتقد انة مافية انسجام بين سنونها متخاصمة مع بعض ويادوب جلست جنبي ألا انقطع النور وقامت الطيارة تدحدر بأقوى سرعة والكابتن ظافر يصيح ( تشهدوا يا الأجاويد انا فداكم ) وتصيبني الرقافة ( الرعشة ) ويش فية يا الربع قالوا ان البنزين غلق وتربست المحركات واعود أتمسك في الكرسي قلت مدام إنها موتة خلني أشوف ها الوجه الصبوح ويوم إنها التفتت والا ذيك الأندوسية (( شغالة )) الي تخوف بلد والسنون كأنها شبك كراسيدا ( 81 ) جي أل واعود اصيح ( اشهد ان لا الة الا الله وان محمد رسول الله ) يعني لا دنيا ولا اخرة ابي اغازل في هذا الوقت الي مثل وجهي ويوم لا مست مقدمة الطيارة احدى جبال السروات 000000 الحمد لله
والله يا عرق صب مني عدم المخدة واعود انعل إبليس واقوم وأتوضاء لصلاة الصبح امحق من حلم

<========================
تحياتي