سالفتي يوم إني اول مره اروح لمصـر

سالفتي يوم إني اول مره اروح لمصـر
هلا ومسهلا ، حياكم الله كللبوكم

ترى السفر زين ، ويوسع الصدر ، ويجلي الهموم
<<<<<< مهوب يقعد في الديره أبد 0

وذا الايام في اجازة الصيف والسفر والفلله ، ومنيب رايح ولانيب مسافر ، بس اني تذكرت ذيك السنين اللي كنت اسافر فيها

وتذكرت أول مره سافرت في حياتي ، الله يالدنيا

كانت اول سفره فيها لمصر أم الدنيا
كانت سفريه انما أيه (أخس ياللغه) رحت انا ويا صديقي ابوناصر0
عاد ابعطيكم سالفتنا في ذيك السفره وتراها صدز بس اني راش عليها شوي بهارات

وهي كالتالي :-
يوم عزمت انا وابوناصر نروح لمصر ، طمرنا للبطحاء عشان نشتري بدل وبنطلونات وعدة السفر ، المهم شرينا لكل واحد بنطلون اسود واحد واربعة قمصان مثل بعض بس ان الوانها تختلف لزوم التغيير ، والبنطلون اسود ماحد مدقق ، وبعد خويي ابوناصر مدحدح ودبيبه وعقب الشقاء لقينا له بنطلون يجي على خصره ، حتى اننا بغينا نشتري له هيلا هوب

وعقب ما خلصنا من الهدوم رحنا وطقينا لنا كميره تحميض عشان بنصور جنب ذاك اللي قعد وماد يديه عند الاهرام ، وشرينا مسجل ابو شريطين ، وعودنا لبيوتنا نرتب شناطنا0

وجمعنا القطه (الفلوس) مع بعض كاش طبعاً وكللها امهات خمس (زرق) ولاهيب واجد ، وقلنا لاهلنا اننا بنروح نخيم في البر (في عز الصيف)

المهم رحنا للمطار لابسين ثيابنا وشمغنا وغيرنا ملابسنا في دورات المياه حقت المطار ، طقينا الشخص ، بس ان شعورنا هابطه من قدام وناط بعض الشعر من ورى بسبة ذا الطاقيه والشماغ ، بس ماشي الحال0

ركبنا الطياره ووصلنا ولله الحمد لمطار القاهره ، والا ذا الامه اللي مستقبلينا وش كثرهم ، اللي يقول نورت يابيه ، اهلاً ياباشا ، اي خدمه ، عاوزين تكس ، عاوزين شئه ، عاوزين لوكنده تباتوا فيها (لا نبي لوكنده نطعس فيها0

وركبنا تكسي مخيس ويقرقع ، وعطيناه عنوان الشقة حقت أم سيد اللي الدزي أو الدئي (الدقي) ويالله وصلنا عقب شق الانفس بعيد ذا الدقي تخبرون منطقه راقيه لازم تصير بعيده
وصلنا الشئه وطارت بنا ام سيد وقامت تهلي وترحب ، وزينت لنا شاهي كوشري يوجع البطن ، وعقب ما قعدنا شوي ، فكرنا في أهم شيء وهو وين نوزي دراهمنا فيه ؟؟

تخبرون قبل ما نسافر كللن محذرنا انتبهوا لاتسرق دراهمكم ترى الحراميه واجد 0

قعدنا نحور وندور في ذالشقه ندور محل نوزيها فيه ، المهم رسينا على اننا نوزيها في وسط سيفون الحمام (الله يعزكم)
مكان ولا القني الازرق يعرفه ، ولحدن متوقعه ، ذكي وقلبي حي لاتخافون علي0

وعقب ما ارتحنا من هم الدراهم ، رحنا نتمشى ومرينا على بعض الاماكن السياحيه اللي في شارع الهرم
وانبسطنا ذيك الليله وعودنا للشقه ودبيناها نومه ، وقمنا الصبح مدري العصر ، وتخبرون الواحد اول ما يقوم الصبح ، اول شيء يسويه يروح للحمام (الله يعزكم)

رحت للحمام ، واستقبلتني الروائح الخايسه الغير مستغربه في ذيك الشقه ، وضيقت صدري على هالصبح ، عاد انا ابي الطف الجو على طول شديت السيفون ، الا أمهات خمس (الزرق) قامت تزورق قدام عيوني ؟؟ تظهر مع الماء وتغطس بسرعه ولاعاد اشوفها ، ياويل تسبدي راحت الدراهم

واصارخ راحت القطه يابوناصر ، حاولنا كسرنا السيفون نبيها ، خلاص راحت ، وشكلها وصلت جنوب القاهره او الحاير حق القاهره

المهم اننا ورطنا ، ماعاد معنا دراهم ، وش السواة ؟؟

مالنا الا نبيع المسجل والكميره ، عشان على الاقل نقدر ناخذ تكسي ونضف وجيهنا لاهلنا 0
قالت ام سيد : انا عاوزه اشتري التسقيل والكمره ، قلنا كم تدفعين ، قالت خمسين لحلوح ، قلنا مايخالف ولو انها لاعبتن علينا

وبعناها وجينا ندربي روسنا ، امحق سفريه ، راحت الدراهم ، وماقعدنا الا يومين ، ولا امدانا نستانس

بس عقبها بفتره سافرت لمصر ، بس اني بطلت اسكن في شقق وتطورت وصرت اسكن في فنادق واخذ معي عشرين بدله والسفره كللها اسبوع ، لزوم الكشخه
بلا ام سيد بلا بطيخ 0



تحياتي

هههههههههههههههههههههه
ههههههههههههههههههه
ههههههههههههههه
ههههههههههه
ههههههه
ههههه
ههه
هه
ه
ضحكتني
مشكوور جرووحي على موااضيعك الحلو
واتمنى لك التوفيق
روح الحب