عشرة ألاف يـوم من عصـر مبــارك

10000 يوم على حكم مبارك بعيوني أنا.شوفي عيوني

اليوم الموافق غرة ربيع أول لسنة 1430, 26 فبراير سنة 2009 يكون قد مر على حكم مبارك 10000 يوم

اعذروني ان كنت حنكد عليكم بس قلت تشاركوني همي وان شاء الله الي جاي يكون أفضل

عشرة ألاف يوم بالكمال والتمام قد مرو على حكم السيد الرئيس محمد حسني مبارك < الله يهديه>

ماذا حدث في مصر؟ ماذا جرى لشعب مصر ؟ ماذا فعل الرئيس لشعب مصر؟

على فكرة وقبل أن أستكمل لكم الموضوع الي بعتبره انا بمثابة < فش الغليل> يعني بخرج شحنات جوايا

انا ولدت قبل ان يأتي مبارك للحكم بفترة بسيطة لا تزيد عن سنه يعني عمري من عمر حكمه< مولدي كان فال سيء على الشعب المصري >

بداية عصر مبارك:

حنعمر حنشغل حنقلل البطاله حنستقر اقتصاديا حنرجع كل شبر من أرض مصر

طبعا قال الكلام ده وانا كنت لسه رضيع يعني لو كنت في شبابي كنت وقفتله وصديته ومنعته يقوله< قال يعني>

بدأ حكمه وعادت سينا كامله وغنت الست شاديه سينا رجعت كامله لينا مصر اليوم في عيد...... قلنا ماشي

الجنيه المصري تراجع في السوق وقال علينا ديون وبلاوي متلتله .......قلنا ماشي

الأسعار بدأت في الارتفاع والسكان بدأت في الازدياد قلنا ماشي <على الأسعار>

لكن سيادته مرتاحش لزيادة السكان شاف ان المصرين زادو أوي زادو عن الحد والدنيا زحمة وهو مش قادر يأكل خمسين مليون مصري حيأكلهم لو كترو عن كده ازاي؟

قال نعمل تحديد للنسل والناس لو عايزة تخلف كفاية عليها طفل او اتنين الصراحه ناس قالت ماشي وكانو كتير والقليل قال مش ماشي < وقال حرام ده رزق من عند ربنا>

هـه بدأت أكبر انا ودخلت المدرسه ورحلة تعليم < حفظكم الله من كل مكروه> المدرسين كانو يشتكو لنا من قلة المرتبات وزيادة الأسعار ربنا عالظالم

الجماعات الاسلاميه اتفتح ليهم السجون والمعتقلات وماتعدووش تقريبا من كل بيت معتقل لدرجة انهم كانو بيتلخبطو وممكن يعتقلو حد مكان حد < العدد في اللمون>

الشعب المصري سكت سكت سكت وبعدين؟ سكت اكتر واكتر واكتر عيطو عيطو ابكو علينا نستحق لاننا أموات

قالو نقلل من التعليم الديني في المدارس والجامعات أصل الشباب بيطلع كاره أمريكا واسرائيل واحنا عايزين نحببهم في اسرائيل وأمريكا

نعمل ايه؟ نعلمهم موسيقى ورسم وألعاب ونعملهم مجموعات تقويه في المواد دي واللغة العربيه والرياضيات مهمين والي ميعرفش في الدين مش مهم حينجح المهم المواد التانية

تخيلو دوله اسلاميه الي يرسب في مادة الدين ينجح ومايعتبرش راسب؟ مش بقولكم عيطو

كبرت أنا كمان وكمان وحسيت بالفقر مش في قلة الأموال وبس ولا والله اقصد فقر بجميع الأشكال الناس حتى بدأت تكره بعض

كنت كل يوم بتعذب من أشكال الناس الي في الشوارع من أطفال بيشمو < جله> وستات كبيرة نايمة في الشوارع بلا رحمه وشباب < حفطكم الله> بدون ملابس مش قلة أدب.. أبدا والله دول بعيد عنكم اتجننو من المعيشه

هاا يا بـوٍكـا كل ده وانت لسه مش فاهم مين السبب فيه ايه بالظبط الي بيحصل ده عادي بيحصل في كل العالم ولا عندكم وبس ولا في الدول الفقيرة ولا فين ومحدش بيجاوب حتى أهلك ميعرفوش

افتتاح كباري ومدينة توشكى الجديدة ومصانع وكل ده والرئيس يقص شريط الافتتاح واحنا زي محنا مبنشوفش من الأساس حاجة من دي

تخيلو ان زرع وثمار توشكى يا بنصدره يا بيتباع بأضعاف الأكل الي بناكله؟

أه جينا للسرطان ابتدى ابتدى ابتدى...... ابتدى السرطان

مواد مسرطنة في الأراضي الزراعيه بايادي مصريه وليس يهوديه كما يدعون هااا

تشوف ياخويا الخوخ والمشمش تفتكرو بطيخ تيجي تاكله < تجيب الي في بطنك> متأسف للكلمه بس دي الحقيقه واسألو أشرقت وباقي المصرين

أما عن سياسات مصر الخارجيه حدث ولا حرج

علاقات بأمريكا واسرائيل ودول أوروبيه بتناصر امريكا واسرائيل زي الفل

علاقات عربيه زي الزفت

احنا اتكرهنا يا جماعه صح؟

والله المصرين اتكرهوو متنكروش انتم يمكن فيكم الي بيحبنا بس عشان عارفنا كويس

بذمتكم مش لما بتشوفو كلمة بوكا وتحتها كلمة مصري بيجيلكم اشمئزاز وبالذات بعد ما شفتونا واحنا بنحارب غزة؟

والي يقولي اننا محاربناش غزة وكنا في صف اسرائيل وقتلنا الأطفال والنساء والشيوخ يقولي ازاي

يعني من الاخر مصري= 1/2 اسرائيلي+1/2عربي ,مش انتم بتعتبرونا كده؟

يالله الله يسامحكم لو كنتم افتكرتوني مصري

أيوه مصري حتى عارف احصائيا بلدنا شوفو شووفوو

في عهد مبارك

8 مليون عاطل

في عهد مبارك

6 مليون مريض بفيرس سي

في عهد مبارك
100 الف مريض بالسرطان < كل عام>

في عهد مبارك
100 ألف قرار اعتقال< معظمه لناس ما ارتكبت ذنوب الا حب لله ورسوله >

في عهد مبارك
المصرين بياكلو زلط مكان العيش وبيركبو الهوا مكان السيارات وبيشربو الدوا مكان الماء واهو كله بثوابه

شكلي طولت عليكم بس من قهري والله يلا سامحوني ان كنت تقلت عليكم

لكم مني أطيب الأمنيات وادعولنا ان ميكنش لسه فيه 10000 يوم تانين في عهد سيادته

بـوٍكـا المطـحوٍن